La pallabra "andecha" de la nuesa Llingua tien un significáu bien guapu y solidariu. Pa mí ye una de les coses perbones del carácter asturianu.
Como bien sabedes, trátase d'echar un gabitu a los demás col trabayu d'unu mesmo. Ye un trabayu coletivu en favor de daquién. A cambiu, sin obligación, el favorecíu por ello suel pagáte por esi llabor n'especies o n'otros favores que tú precises más alantre. Too ello por facer el bien a esos vecinos o persones que lo precisen.
La pallabra "sestaferia" trátase de facer un llabor en comuña pal beneficiu de toos. Nuna pallabra, trabayar pel pueblu (nun confundise y dicir "pol" pueblu, que nun ye lo mesmo). Nestu casu trabayamos toos por favorecenos a toos nosotros.
Pues bien, de pués de too esto, trato de convencer, convidar y facer lo posible pa que nesti Amagüestu daquién de los que taes lleendo esto, seaes quien davos cuenta que precisamos (los neños, yo y toos) que esi conocimientu que caún y caúna vosotros guardaes dientro tengaes a bien compartilo con toos.
Dicho d'otru mou.
Munchos de vosotros soes los espertos, los que más sabés, de .... cómo se facía tal o cual xuguete, de cómo xugabes a un xuegu que nun costaba perrona; y......compartilo, cuntalo, o enseñalo a los más mozos.
Ye una ocasión perbona pa que los escolinos acolumbren el saber que tienen los más vieyos en casa y valoren estos saberes.
¿Daquién de vosotros sabe facer un "riqui-raque" con ñueces, un palu y filu?
¿Daquién sabe dalgún cancíu de xuegos? Pase misi, Mambrú, la Virxen la Cueva (si ye posible n'asturianu)?
¿Daquién sabe cómo se facién moñeques coles fueyes les panoyes?
¿Daquién sabe cómo fabricaben xuguetes enantes?
Pues bien, ya taes tardando. Trátase de ser quien, de ser valientes y esi día de Magüestu osar, atrevese a enseñalo a los nuesos neños.
Pa too ello, tenés que dirixivos a la AMPA del Colexu y asina poder organizalo bien.
Anímovos a ello con tol enfotu. Tengo la seguranza que sedrá una esperiencia bien provechosa pa toos.
Gracies
Santiago
No hay comentarios:
Publicar un comentario