12/1/17

Tengo que cuntalo.























Siéntolo nel alma pero toi qu'arreviento por cuntalo.

Resulta que ayeri, por eses coses de la mio profesión como maestru, aconteció una cosa bien curiosa.

Daqué ocasiones, más de les que la xente cree, asoceden coses como estes que vos voi cuntar.

A veces, los nuesos escolinos dán-nos llecciones bien grandes de vida y de calidá. Sorprénden-nos y faen que vaya unu a durmir bien a gustu, al sen cola vida, col llabor y bien orgullosu de los escolinos colos comparte tiempu, vivencies, rises, penes, aprender a cada minutu con ellos  y ...  enseñanza. Coses que faen qu'acabemos escaeciendo y asonsoñándonos de les penuries del día a día que vivimos  y que nun son quien a acabar con estos xestos y escenes bien emponderables

Pues resulta que, ni más ni menos, que na mitá la clas de Llingua Asturiana tábamos faciendo una llectura en comuña y ... nel turnu qu'asocede, tocó-y a una escolina que-y cuesta daqué eso de lleer.
El maestru, fae lo posible p'animala a ello col so saber y coles sos trampes. 
Resulta qu'ella fae tol esfuerzu con intención y bien de ganes, poniendo procuru.

Ya por ello, esti maestru, sintíase bien orgulloso del llabor pero.....

Cuando llevaba un cachín lleendo y cuando'l maestru diz eso de.... ¡Perbién, sigui tú, Xuanín! Pa cambiar esi turnu lletura ...

Un collaciu desta moza de primeru, dende una mesa bien lloñe, entama aplaudila con toles ganes y, amás, animala d'un mou bien xenerosu. 

De siguío, tola clas entamó aplaudir y felicitar a la escolina. 

Tovía toi viendo la carina d'esta neña. La so sonrisa y la cara satisfaición.

Ello yera una escena más qu'agradecía pa esti maestru, pero resulta que...

De sópitu, tolos collacios la clas entamaron a aplaudila y animala, mirando pa ella y .... dalgunos (incluyendo a esti maestru), mirando con complicidá pal escolín qu'entamó esta escena bien plausible.

Esti maestru, finó la clas bien contentu con tolo asocedío y nun fué quien evitar da-y la norabona a esti neñu por un xestu cola so collacia  y que, amás, fizo que tola clas respaldara too ello, y, toi bien ciertu, qu'echó un gabitu bien grande y dio-y tola fuercia pa siguir lluchando con eses lletres que-y dan guerra a la so collacia, ni más ni menos.

Por too ello, por cómo estes coses faen cómo se sientan bien un montonáu de persones. Por sintime perbién nesta profesión como díes asina. Al fin y al casu esto nun ye ni más ni menos qu'ún bon exemplu del cómo son y faen munchos neños.


Munches gracies a tolos escolinos

Nota: 

Ya sé qu'esti ye un blog educativu, pero.... que meyor sitiu pa mostrar un exemplu bien plausible de lo que faen los neños, un bon exemplu y nel que los protagonistes son ellos mesmos.

Que meyor mou que reconoce-yos el so méritu y el so llabor. Que meyor ocasión de qu'ellos mesmos sean quien vese equí como protagonistes.

Santiago

1 comentario: