Paez ser que o bien hai daqué malentendíu o non se cuntan les coses como son.
El casu ye que s'encomendó un llabor a los escolin@s de cuartu y paez que fueren deberes pa los pas o familia y qu'amás non s'esplicaran les coses en clas por esti maestru.
Vamos ver:
Primeru.-
Encomendóse facer un guión pa ser quien espresase n'asturianu y resumir aquello que caún de los escolinos había aprendíu al rodiu de les mazcaraes d'iviernu y de "el Guirria".
Segundu.-
Col guión fechu y na clas viniente, trabayaríase nel aula faciendo caún de los escolinos la so grabación sonora con "Audacity Portable". Crearíase un archivu de soníu col llabor de caún o caúna los escolin@s.
Terceru.-
Con esti archivu sonoro y na clas usaríamos la ferramienta "Voki" col maestru pa crear el personaxe lo más asemeyao al "periodista" que cunta estes noticies. Pa ello non ye necesario crear cuentes nin rexistrase.
Con too ello, publicaríamoslo nel blog como producción y protagonismu de los propios escolin@s.
Aclarando:
- A los escolin@s desplicose-yos asina. (Con entrugar a cada neñ@, él cuntara lo que-y paez o vió).
- La llabor d'internet faenla col profe en clas. Non la lleven de llabor pa casa sin conocencia previa.
- Caún de los escolin@s puede en casa, si quier y lu dexen, investigar con estes ferramientes. Pa eso se-yos presentaren en clas y se-yos esplicaren los primeros pasos del so funcionamientu. El trabayu y conocimientu de verdá faese de forma praútica na clas colos archivos iguaos por caún los escolin@s. Esta llabor d'investigación o trabayu en casa por internet ye voluntaria.
- Esta investigación por parte los escolin@s ye beneficiosa y fae que la esperiencia del qu'investiga nello seya bien espertu y eche un gabitu en comuña a los sos collacios, eso sí, espresándose en Llingua Asturiana.
- Esta llabor paez que ta gustando y motivando a la mayor parte los escolinos de cuartu.
- Esta llabor trabaya los oxetivos y conteníos del currículo d'asturianu en tou momentu. El oxetivu final ye'l conocimientu y deprendimientu de la Llingua Asturiana.
- Esta xera y lo que nella se fae, ye únicamente una ferramienta de trabayu cola Llingua Asturiana y l'oxetivu non ye ni esti blog nin la competencia dixital. Eso sí, válgome d'estes ferramientes pa trabayar esta asignatura y aumentar, de pasu esa competencia dixital y la motivación de los escolinos.
Non taría de más recordar qu'esti cursu non tenemos llibru de testu ya que naide lu mercó, nin se pidió y que los exemplares que tenemos nel aula son material escritu, fechu y non son reutilizables. Asina, la gran parte d'exercicios y trabayos tan en soportes que non son el llibru (inexistente) de Llingua Asturiana, eso sí, son soportes qu'esti maestru crea en so mayor parte o que faen los propios escolin@s.
Entiendo que too esto non seya platu del mismu gustu pa tol mundu y preócupame, anque sólo fuera una la única persona la que tuviere mal a gustu. Esto bien m'atristaya y trato d'atopar arreglu a ello. Prestaríame que tol mundu tuviere d'acuerdu y bien feliz pero tamién entiendo que les formes de trabayu novedoses y que non seyan les clásiques o les ya conocíes causen medrana.
Por ciertu; como esti blog ye esa ferramienta de trabayu de la que falamos, bien puede comprobase cuál yera la xera que se-yos encomendó y cual ye la entrada del blog que yera el recordatoriu del pasu a pasu a facer.
Si señala nel enllaz, colará pa elli.
Por últimu, dicir a cada familia que me tien a la so disposición pa esplicar, aclarar, echar un gabitu o meyorar en lo que pueda a los sos escolinos y al so desarrollu académicu y evitar malentendíos. Ya saben los horarios o bien pueden ponese en contactu colos sos tutores.
Espero que quede bien claru que les xeres o llabores son pa los escolinos y non pa la familia. Asina quiero quede bien claro que se-yos proporcionen tolos medios o alternatives a elles pa facer caúna destes xeres o llabores.
Pongo tol enfotu en dicir qu'esti blog céntrase nos escolinos y que la información ye pa ellos primeramente. Los escolin@s saben de qué trata caúna de les entrades del so cursu porque pa ello asisten a clas y son los que tienen qu'enterase y saber de lo que se fala o publica nel blog.
Les otres persones que lleen esti blog pierden gran parte de la información porque non participen de tol procesu y sólo ven lo que se publica nel blog que ye una mínima parte del trabayu diariu.
Queda claru que'l blog non ye un tutorial pa les families de lo que tienen que facer los sos fíos, sicasí los escolinos saben de lo que se publica y de lo que non se publica relacionau con ello y que ven, falamos o tomen nota na clas del día a día.
Atte.
