Bienveníos al cursu 2013 - 14
Ya tamos equí. Perdonae la tardanza pero teníamos que dexar too n'ordre pa entamar col pie acuadrau.
Agora que ya tenemos iguau'l proyector na clas ye la ocasión de facelo bien.
El Demoniu Manegueru y yo esperamos que vos sea de provechu, pa los escolinos, pa los pas y mas y si ello non ye pedir muncho... pa tolos que per equí echen una güeyaduca.
Non queremos escaecenos esi trasnu que ye'l "Demoniu" y yo, de la llabor que faen un montonáu de persones pola nuesa Llingua y Cultura sin afán de ganar perres ni d'apaecer en cartelos o noticies empoderándolos.
Por ello dende equí tengo que ponderar esi ser discretu, que sempre tuvo ehí, y que fizo tolo que pudo por aportar a la nuesa Llingua y Cultura tiempu, enfotu, ganes... y tolo que seya posible cada día que se-y pidió que nos echara un gabitu a los profes, maestros o escolinos.
Trátase de la Oficina de Normalización Llingüística del Conceyu de Xixón y toles persones que nella trabayen, pero n'especial nel enfotu y nel trabayu de tantos años fechu con tantu cariñu pola nuesa cultura por María Xosé Rodríguez. Munches gracies María Xosé, gracies pol to empeñu y por contaxianos con esti gustu pola nuesa Llingua. ¡Que sepas que valoramos enforma el to trabayu!
